په ولسي جرګه کې د کندز ولایت د خلکو له استازي سره کتنه!
د سرحدونو او قبایلو چارو وزارت مسلکي مرستیال ښاغلي ډاکټر فریدون بارکزي نن چهارشنبې د ۱۳۹۸ لمریز کال د سلواغې میاشتې پر ۹ مه نېټه په ولسي جرګه کې د کندز ولایت د خلکو له استازي ښاغلي انجينر کمال صافي او د یاد ولایت د سرحدونو او قبایلو چارو له رئیس ښاغلي نظیف الله نظیف سره د خپل کار په دفتر کې وکتل.
په دې کتنه کې، چې د ولایتونو سره د اړیکو ریاست سرپرست ښاغلی حمیدالله خېبر هم حاضر و، راغلي استازي د خپلو یو لړ سیمه ییزو ستونزو شریکولو، ترڅنګ د سرحدونو او قبایلو چارو وزارت د ټولو مېشتو درنو قومونو ګډو کور وباله او په ملي مسایلو کې یې د خپلو همکاریو ډاډ ورکړ.
ورپسې د سرحدونو او قبایلو چارو وزارت مسلکي مرستیال ښاغلي ډاکټر فریدون بارکزي په خپلو خبرو کې د خلکو د استازي او د سرحدونو او قبایلو چارو د رئيس ستونزې پر ځای وبللې او د نوموړو سره یې په ملي مسایلو کې په ګډو هلو ځلو ټینګار وکړ.
