په بادغيس ولایت کې ۱۵ کلنه شخړه حل او په بلخ کې د دوه مرورو کورنيو ترمنځ روغه وشوه
چهارشنبه ۱۴۴۶/۵/۱۸
د بادغيس ولايت په جوند ولسوالۍ کې د دوو قريو تر منځ د ۱۵ کلنو هغه اوږده شخړه هواره شوه، چې پکې د وژنې ترڅنګ دواړو خواوو ته ګڼ مالي زيانونه هم رسېدلي وو.
دغې شخړې چې ژور قومي اختلافات يې هم رامنځ ته کړي وو د ياد ولايت د سرحدونو، قومونو او قبايلو چارو رياست د مسؤلينو، قومي مشرانو، علماء کرامو او جرګه کوونکو په شريکو همکاريو د عادلانه پريکړې په اساس حل او دواړو طرفونو يو بل ته په بښنې کولو سره تېر هېر کړل، چې په همدې توګه له يو بل سره غاړه غړۍ شول.
همداراز د بلخ ولايت په دولت آباد ولسوالۍ کې د دوو مرورو کورنيو ترمنځ د کورنی جنجال له امله هغه دوه کلنه شخړه هواره شوه، چې ترمنځ يې لوی اختلافات موجود و او د همدې له امله يې يو بل سره راشه درشه نه کوله.
د بلخ ولايت د سرحدونو، قومونو او قبايلو چارو رياست په هماهنګۍ د شخړو د حل کميسيون، قومي مشرانو، ديني عالمانو او اسلامي امارت د منسوبينو په هلو ځلو دغه کورنۍ د جلاجلا ناستو په ترڅ کې سولې ته اماده شوې او د مصلحينو له فيصلې وروسته يو بل ته ورغاړې وتل، چې په دې سره يې دوه کلنه دښمني په دوستۍ بدله شوه.
