په باد غيس ولايت کې د مهر پر سر رامنځته شوې شخړه حل شوه
شنبه ۱۸/۳/۱۴۴۶
هغه جنجال چې شپږ مياشتې وړاندې د ياد ولايت په بالا مرغاب ولسوالۍ کې د يوې مرمنې د مهر پر سر د دوو کورنيو ترمنځ پېښ شوی و او له امله يې ژور قومي اختلافات هم راپورته شوي وو، د دغه ولايت د سرحدونو، قومونو او قبايلو چارو رياست د مسؤلينو په همغږۍ، د مصلحينو او علماوو په ګډه همکارۍ حل او فصل شو.
جرګه کوونکو مشرانو د موضوع ټول اړخونه تعقيب کړل، علماوو د اسلام په رڼا کې د مهر ارزښت روښانه کړ او دواړه طرفونه يې وپوهول، په پاي کې يې د يوې عادلانه پريکړې پر اساس فيصله واوروله چې د ښکېلو اړخونو د خوښۍ او رضايت سبب وګرځيده.
دغو کورنيو د ا.ا.ا د مسؤلينو مننه وکړه چې په خپلو هلو ځلو يې د دوی جنجال ورحل کړ او ژمنه يې وکړه چې له نن وروسته به د شخړو په ځاي د سولې ژوند غوره کوي او له يو بل سره به په سولییز ډول راشه درشه کوي.
