(( ولسونه بايد د نظام حمايت وکړي او د هېڅ ډلې په تبليغاتو ونه غولېږي ))
سهشنبه ۱۵ جمادیالاول ۱۴۴۸
د سرحدونو، قومونو او قبایلو چارو وزارت د سرحدي پلټنو معین، مولوي عنایت الله شجاع، دغه څرګندونې په فاریاب ولایت کې د یاد وزارت له لوري د اسلامي نظام تر چتر لاندې د شریعت د نفاذ او همغږۍ په موخه جوړې شوې ولسي غونډې پرمهال وکړې.
نوموړي خلک د اميرالمؤمنين حفظه الله تعالی اطاعت ته راوبلل او ويې ويل: چې ولسونه باید د نظام د ملاتړ ترڅنګ د یووالي او همغږۍ په لاسته راوړلو کې خپله ونډه او مسؤليت ادا کړي او د هرې ډلې د تبلیغاتو پر وړاندې له غور او دقت څخه کار واخلي. ښاغلي شجاع زیاته کړه، چې افغانان باید هغه خلک درک کړي، چې شل کاله یې په بېلابېلو نومونو غولولي دي، ځکه د هغوی کړنې او پایلې ټولو ته څرګندې دي.
ورپسې د جرګو او قبايلي چارو د همغږۍ رئيس مولوي محمد آجان رهبر په خپلو خبرو کې وويل: هر څوک چې د افغانستان او نظام پر وړاندې د بد نیت له مخې د لاس غځولو هڅه وکړي، ولس او نظام به یې په ګډه مخه ونیسي. نوموړي ټینګار وکړ، چې د هېواد امنیت او اتحاد ساتنه د ټولو ګډ مسؤلیت دی. هغه له خلکو وغوښتل، چې د شرعي احکامو په پلې کولو او خپرولو کې خپلې هڅې جاري وساتي.
غونډه کې دیني عالمانو او قومي مشرانو وویل، چې د ا.ا.ا له راتګ سره په هېواد کې د امنیت او ولسي همغږۍ فضا برابره شوې ده. هغوی د خلکو د ستونزو د حل په برخه کې د مسؤلینو هڅې وستایلې او زیاته یې کړه، چې د افغانستان دښمنان د اسلامي امارت او ولس ترمنځ د بيلتون هڅې کوي، خو دا هڅې بېځایه، خيال او ليونتوب دي، هېڅوک نه شي کولای د ولس او نظام ترمنځ فاصيلې ايجاد کړي. دوی همداراز د خپلو سيمه ييزو ستونزو په يادولو سره له مسؤلينو وغوښتل، چې د حل لارې ورته ولټوي.
