د کابل په شکر دره ولسوالۍ کې له ولسونو سره غونډه
دوشنبه/۱۴/ جمادیالاولی ۱۴۴۸
د سرحدونو، قومونو او قبايلو چارو وزارت له لوري د یوه پلاوي په مشري د کابل په شکر دره ولسوالۍ کې (د اسلامي نظام تر چتر لاندي د شريعت د نفاذ او همغږۍ) په عنوان له ولسي خلکو سره غونډه ترسره کړه چې پرمهال یې د یادې ولسوالۍ ديني عالمانو، قومي مشرانو، متنفذينو او ځوانانو ګډون کړی وو.
د دغې غونډې په ترڅ کې د وزارت د دعوت او ارشاد رئيس مفتي شفيع الله ثاقب د ناستې ګډونوالو ته د شخړو د حل او د وزارت له لوري د نورو ترسره شویو فعالیتونو یادونه وکړه ویې ويل، چې دغه وزارت په ټول هېواد کې له څلورو زرو زیاتې شخړې حل کړې او د خلکو د پخلاینې او اتحاد په برخه کې یې لاسته راوړنې د یادولو دي.
هغه دغه راز د خلکو او مسؤلینو ترمنځ د همکارۍ پر دوام ټینګار وکړ ویې ویل چې، د اسلامي امارت مسؤلین ځانونه د خلکو خدمت ته ژمن بولي او د ولس د ستونزو حل خپل مسؤلیت ګڼي.
ورپسې ديني عالمانو او قومي مشرانو غونډې ته خبرې وکړې ویې ویل، چې د اسلامي نظام د قیام لپاره ټولو خلکو قربانۍ ورکړې دي نو ساتنه یې د ټولو ګډ مسؤلیت دی. یادو مشرانو ژمنه وکړه چې د اميرالمؤمنين حفظه الله فرمانونه، د ټولنې د سمون لپاره دي او دوی به یې په خپرولو او پلي کولو کې پوره همکاري کوي.
