د نورستان ولایت له قومي مشرانو سره لیدنه
شنبه/۵/ذوالقعدة/ ۱۴۴۶
د سرحدونو، قومونو او قبایلو چارو وزارت د جرګو او قبایلو چارو د همغږۍ معین الحاج مولوي محمد علي جان احمد نن غرمه مهال د نورستان ولایت وایګل ولسوالۍ له قومي مشرانو سره په خپل کاري دفتر کې وکتل.
په دغه کتنه کې قومي مشرانو د یادې سیمې د ولسونو ترمنځ د ورورولۍ او یووالي ډاډ څرګند کړ، ویې ویل چې دوی د اشغال پر وړاندې کلکه مبارزه کړې او غربي پوځونه یې نه دي پرېښي چې دغې سیمې ته داخل شي. راغلیو سپین ږیرو وایګل د ستراتیژیک موقعیت او ښېرازه طبعیت له امله یوه اړینه سیمه وبلله او د ځينې ضمني ستونزو ترڅنګ یې د ریاست الوزراء په حکم د یادې سیمې د ولسوالۍ کېدو او نورو تشکیلاتي چارو د پیل غوښتنه وکړه.
د جرګو او قبایلو چارو د همغږۍ مرستیال ښاغلي احمد ولسي استازو ته هرکلی وکړ، زیاته یې کړه، چې د دې ولسونو مبارزه او ستړیاوې د ډېرې ستاینې وړ دي او د اسلامي نظام په حاکمیت کې د دې خاورې ټولو خلګو برخه اخیستې. نوموړي قومي مشرانو ته د ډاډ په څرګندولو سره وویل چې د دوی ستونزو ته د خپل وس په اندازه حل لارې لټوي او د ریاست الوزراء په شمول به یې تر اړوند ارګانونو پورې رسوي
