د بلخ ولايت په چمتال ولسوالي کې د لسګونو کلونو شخړه حل شوه
دبلخ ولايت په چمتال ولسوالي کې د څلورو بېلابيلو کورنيو تر منځ شخړه چې له لسيزو را پدېخوايې جريان درلود او له طرفينو پکې ٦ کسان مړه او يو شمير زخميان وو حل او په دوستۍ بدله شوه. د يادې شخړې د حل په موخه چمتال ولسوالي ته د بلخ ولايت والي الحاج محمد يوسف وفا، د سرحدونو، قومونو او قبايلو چارو رئيس ښاغلي مولوي سردار محمد محمدي او يو شمير نورو دولتي مسؤلينو د خپل رسمي سفر په ترڅ کې د ځايي مېشتو قومي مشرانو او مخورو په ګډون ګډه غونډه جوړه کړه. غونډې ته د بلخ والي ښاغلي وفا او د سرحدونو، قومونو او قبايلو چارو رئيس ښاغلي محمدي د اسلام له نظره د يووالي، سولې او دوستي په اړه هر اړخيزې خبرې وکړې دوی وویل: دا د الله ج او رسول وینا ده چې د دوو مسلمانانو ترمنځ سوله او دوستي منځ ته راولئ ځکه په سوله کې خیر او برکت دی. وروسته په شخړه کې ښکېلو څلور واړه کورنيو یو بل ته د دوستۍ غاړې ورکړې او ژمنه يې وکړه چې وروسته له دې به یو بل ته ستونزې نه جوړوي او په ټولنه کې به د ورورولۍ ژوند ته ادامه ورکوي.
