د وزارت اړوند رحمن بابا عالي لېسه کې د قرآن عظيم الشان ختم او د څه باندې ۳۰۰ تنو زده کوونکو څخه د سیرة النبي (ص) ازموینه واخیستل شوه.
سیالۍ د قرآن مجید د څو مبارکو ايتونو په تلاوت سره پیل شوه، ورپسې د رحمن بابا عالي لېسې آمر ښاغلي محمد عمر معصومي ګډونوالو ته د سیالۍ په اړه لازم معلومات ورکړل، د بشریت د ستر لارښود حضرت نبي کریم (ص) د مبارک سیرت د ارزښت په اړه یې خبرې وکړې او د دا ډول سیالیو په لاره اچول یې د زده کوونکو د دیني معلوماتو د زیاتېدو، زده کړو ته د زده کوونکو د هڅوونې او د زده کوونکو د ذهني ودې د پراختیا لامل وبلل او د خبرو په پای کې د دې سیالۍ د جوړونکو د هلو ځلو او هڅو څخه مننه وکړه.
د یادونې وړ ده، چې ددې سیالۍ پایلې به د راتلونکې شنبې په ورځ په یوه پرتمینه غونډه کې اعلان شي او د لوړو نومرو اخیستونکو زده کوونکو ته به د هغوی د هڅونې، تشویق او ستاینې په موخه به بېلابېلې ډالۍ د سرحدونو او قبايلو چارو وزارت د مقام او لېسې د ادارې له خوا ورکړل شي.
