په هرات کې د ۸ کلنې شخړې ترڅنګ يوه بله شخړه هم هواره شوه
چهارشنبه ۱۴۴۶/۷/۲۲
د هرات ولايت په کشک کوهنه ولسوالۍ کې د نورزي قوم د دوو کورنيو ترمنځ هغه راپورته شوې شخړه هواره شوه، چې له دواړو لوريو څخه په کې دوه تنه وژل شوي، څو تنه ټپيان او ګڼ مالي تاوانونه اوښتي وو.
د دغې شخړې د هواري په موخه د هرات د سرحدونو، قومونو او قبايلو چارو رئيس يادې ولسوالۍ ته د خپل سفر په ترڅ کې د قومي مشرانو، علماوو او اسلامي امارت ځينو مسؤلينو په ملتيا يوه لويه غونډه را وبلله، موضوع يې وڅېړله او ښکېل لورې يې روغې جوړې ته راضي کړل، چې په همدی سره يې د مسؤلينو لخوا شوې فيصله ومنله او سره غاړه غړۍ شول.
ورته مهال د بلخ ولايت په شولګرې ولسوالۍ کې هم د دوو کورنيو ترمنځ د ياد ولايت د سرحدونو، قومونو او قبايلو چارو رياست مسؤلينو او ځايې خلکو په هڅو د ځمکې د ملکيت پر سر هغه دوه کلنه شخړه پاي ته ورسېده، چې له امله يې دواړو کورنيو ته مالي تاوانونو اوښتي وو او له سوله ييز ژوند څخه بې برخې وې. دغه کورنۍ چې د راپورته شويو جنجالونو څخه په تنګ راغلې وې د جرګه کوونکو فيصله يې ومنله او له دښمنۍ لاس په سر شول.
