شیخ محمد روحاني قوم د سرتاسري شورا له مشر او غړو سره کتنه!
د سرحدونو او قبایلو چارو وزیر ښاغلي محب الله صمیم نن له غرمې وروسته د شیخ محمد روحاني قوم د سرتاسري شورا له مشر ښاغلي حاجي رحمت ګل رسولي او غړو سره د وزارت د کنفرانسونو په تالار کې وکتل.
په دې کتنه کې ښاغلي رسولي د یادې شورا، چې په بېلابېلو ولایتونو کې استازي لري د فعالیتونو او کړنو په اړه معلومات وړاندې کړل او د سولې او ملي یووالي د ټینګښت په برخه کې د قومي شورا ګانو په ارزښت خبرې وکړې دغه راز راغلو مشرانو په بېلابېلو برخو کې د سرحدونو او قبایلو چارو وزارت د مشرتابه هڅې د ستاینې وړ وبللې او د موجوده نظام څخه یې د بشپړ ملاتړ څرګندولو په ترڅ کې له وزارت سره د هر راز همکاریو ډاډ ورکړ.
ورپسې ښاغلي محب الله صمیم په خپلو خبرو کې د یادې شورا مشرانو له هېوادني احساس څخه مننه وکړه وې ویل: خوښ یو، چې ستاسو په شان مشران او کدرونه مو په هېواد کې شتون لري، چې تل یې د سولې او ملي یووالي د ټینګښت په برخو کې هلې ځلې کړي دي، دا د ټولو غوره لار ده، چې یو موټی واوسو او د خپل هېواد او خلکو لپاره کار وکړو، ترڅو د تلپاتې او باعزته سولې خاوندان شو.
دغه راز ښاغلي صمیم زیاته کړه، ستاسو درنو مشرانو د سلامشور سره څخه په استفادې سره به وکولای شو، چې هېوادوالو ته د غوره خدمتونو جوګه شو، ځکه چې د ولس خوشالي زموږ خوشالي او د سرحدونو او قبایلو چارو وزارت مشرتابه د تل په څېر ستاسو په خدمت کې دی.
