د ښوونکي نړیواله ورځ ولمانځل شوه!
په هغه غونډه کې، چې نن شنبې د ۱۳۹۸ لمریز کال د تلې میاشتې په ۱۳ مه نېټه د رحمان بابا په عالي لېسه کې د ښوونکي نړیوالې ورځې په مناسبت جوړه شوې وه د سرحدونو او قبایلو چارو وزارت د جرګو او قبایلو چارو د همغږۍ مرستیال ښاغلي محمد یعقوب احمدزي، مالي او اداري مرستیال ښاغلي شجاع الملک جلاله، د مقام د دفتر رئيس ښاغلي نور اقا ناصري، د جرګو او قبايلي چارو ريس ښاغلي نياز محمد اميري، د پلان او پاليسۍ ريس ښاغلي محمد امين حيدري، ښاغلي غني زي، د ښوونې او روزنې وارسي کوونکي ښاغلي جمال الدین زاهد، د لېسو مسؤل مولوي حنیفي، د یادې لېسې امر ښاغلي محمد عمر معصومي، ښوونکو او زده کوونکو ګډون درلود.
په یاده غونډه کې لومړي د قرانکریم څو مبارک ایتونه تلاوت او ملي سرود خپور شو.
ورپسې د جرګو او قبایلو چارو د همغږۍ معین ښاغلي محمد یعقوب احمدزي د سرحدونو او قبایلو چارو وزیر ښاغلي محمد شفیق ګل آغا شېرزي د نیکو هیلو او سلامونو د وړاندې کولو ترڅنګ د ښوونکي د ورځې په مناسبت د محترم وزير صاحب پيغام ولوست زیاته یې کړه، چې د ښوونکي د لمانځلو ورځ یوه ورځ نه ده، بلکې هره ورځ د ښوونکي د قدر او عزت ورځ ده، موږ په دې ویاړو، چې د وزارت په اړوند لېسو کې په کار پوه او مسلکي استادان لرو، چې زده کوونکو ته یې د زده کړې ښه زمینه برابره کړې ده له زده کوونکو مو هیله داده، چې د خپلو ښوونکو په ارزښت پوه شي او درناوی ورته وکړي.
همدا راز ښاغلي احمدزي په خپلو خبرو کې وویل: چې د وزارت په اړوندو لېسو کې مثبت بدلونونه راغلي او تر ډېره بريده د زده کوونکو ستونزې حل شوي دي، او کومې ستونزې، چې شتون لري انشاالله ډېر ژر به ورته د حل لارې چارې پیدا کړو.
ورپسې د ښووونې او روزنې ریاست وارسي کوونکي ښاغلي جمال الدین زاهد خبرې وکړې او د ښوونکې په ارزښت ، مقام او زیارګاللو یې رڼا واچوله.
د رحمان بابا د لېسې امر ښاغلي محمد عمر معصومي هم د ښوونکي د نړیوالې ورځ په مناسبت خبرې وکړې او د ښوونکي د ورځې مبارکي یې وویله.
همد راز مولوي محمد یاسین، مولوي سعید محمد د ښوونکي د ورځې لمانځلو او ارزښت سربېره یې د اسلام له نظره د ښوونکي مقام ته اشاره وکړه او د زده کوونکو یې وغوښتل، چې د خپلو استادانو درناوی وکړي.
دغه راز د رحمان بابا د لېسې تدریسي مدیر ښاغلي شاپور خان د پوهنې د محترم وزير پیغام د غونډې ګډون والو ته ولوست.
د دې نړیوالې ورځې په مناسبت په دې جوړه شوې غونډه کې زده کوونکو د ښوونکو درانه مقام ته شعرونه وویل، تمثیلي ټوټه، چې زده کوونکي یې د ښوونکي درناوی او په ښوونځي کې د نظم او دسپلین په پام کې نیولو ته رابلل هم نندارې ته وړاندې شوه.
وروسته هغه ډالۍ چې د دې ارزښتناکې ورځې په مناسبت برابرې شوې وې ښوونکو ته ورکړی شوې او یو شمېر زده کوونکي په ستاینلیکونو وویاړل شول.
