د ټرانسپورت نوی ټاکل شوی مدیر خپلو کارکوونکو ته ور وپېژندل شو
دوشنبه/۲۵/شوال المکرم/۱۴۴۴
د سرحدونو، قومونو او قبایلو چارو وزارت د مالي او حسابي چارو ریاست اړوند د ترانسپورت عمومي مدیر ښاغلی ملا عبدالولي خپلو کارکوونکو ته ور وپېژندل شو. په دغه ناسته کې د یاد وزارت بشري سرچینو رئیس مولوي کریم شاه تیلوي، د مالي او حسابي چارو رئیس محمد سلیم ستانیکزی، د استخدام آمر امرالله اوریاخیل او نورو کارکوونکو ګډون کړی وو. په پیل کې د استخدام آمر ښاغلي اوریاخیل د نوي ټاکل شوي عمومي مدیر حکم ګډونوالو ته په لوړ غږ ولوست. وروسته د بشري سرچینو رئیس ښاغلي تیلوي نوی ټاکل شوی عمومي مدیر یو ځیرک، په کار پوه او متدین شخصیت یاد کړ او د پخواني مدیر له ستړیاوو او کارونو څخه یې ستاینه وکړه. هغه وویل: تغیر او تبدیل د ادارتو یو مهم اصل دی، په اسلامي نظام کې یو مسؤلیت په سمه توګه ترسره کول او د ملت خدمت کول یو لوی اجر لري، نوموړي نوي ټاکل شوي عمومي مدیر ته د مبارکي تر څنګ په چارو کې د بریا غوښتنه وکړه. په پای کې د مالي او حسابي چارو رئیس ښاغلي ستانیکزي د نوي ټاکل شوي عمومي مدیر په مقررۍ خوښي وښوده او له خپلو نورو کارکوونکو څخه یې مننه وکړه چې خپل کارونه په ښه ډول مخ ته وړي. نوموړي نوي ټاکل شوي عمومي مدیر ته په چارو کې د بریالیتوب غوښتنه وکړه او د دوعائیې په کولو سره ناسته پای ته ورسېده.
