د وزارت اړوند خوشال بابا په عالي لیسه کې ژور اصلاحات تطبیق او مثبت بدلونونه رامنځته شوې دي!
د سرحدونو او قبایلو چارو وزارت مسلکي مرستیال ښاغلي ډاکټر فریدون بارکزي د وزارت اړوندو لیسو د وضعیت د څېړلو په دوام نن سهار د خوشال بابا عالي ليسې ته تشریف یوړاو د هېواد د ملي سرود د غږولو په مراسمو کې، چې له اتلسو کلونو وروسته هر سهار له تدریس مخکې د دغې لیسې په یونیفورم کې د ملبسو زده کوونکو او فرهنګي ټیم له خوا غږول کیږي برخه واخیسته.
په دې لیدنه کې، چې د ملي شورا په مشرانو جرګه کې د ارزګان ولایت معزز سناتور ښاغلی امان الله اعظمي هم ورسره ملګري و، ښاغلي مسلکي مرستیال د وزارت په اړوندو لیسو کې د ژورو اصلاحاتو د پروسی پر دوام باندې په ټینګار سره وویل: د وزارت لیسې باید له هر پلوه نمونه وي، دا د وزارت لومړیتوب دی چې زده کوونکو ته د زده کړې هرډول آسانیتاوې برابرې کړو ترڅو په مناسبه فضا کې خپلو زده کړو ته دوام ورکړي
ښاغلي بارکزي وروسته د یادې لیسې له لیلیې او تدریسی ټولګیو څخه هم لیدنه وکړه او د چارو د بهبود په موخه یې اړوندو ریاستونو ته لازمې لارښوونې وکړې.
د ارزګان معزز سناتور امان الله اعظمی په یادو لیسو کې د ژورو اصلاحاتو او مثبتو بدلونونو د راوستو په برخو توګه د ښاغلي مسلکي معین او ادارې هلې ځلې وستایلې او د دغو اصلاحاتو د دوام غوښتنه یې وکړه
