د نوي تعلمي کال پیل ته د چارو په چمتوالي او همغږۍ ټینګار!
د سرحدونو او قبایلو چارو وزارت مسلکي مرستیال ښاغلي ډاکټر فریدون بارکزي نن پنجشنبې د روان لمریز کال د کب میاشتې پر ۱۵ مه نېټه د یوې غونډې په ترڅ د وزارت له یو شمېر رئيسانو او اړوند لېسو له مسؤلینو سره د نوي تعلمي کال پیل ته د چارو په چمتوالي او همغږۍ بحث او خبرې وکړې.
په یاده غونډه کې د وزارت مسلکي مرستیال ښاغلي بارکزي ټینګار پر دې و، چې د نوي تعلمي کال لپاره نوي زده کوونکي جلب او هغوی ته د ښه تدريس او د زده کړې مناسبې فضا رامنځته کولو کې خپلې هلې ځلې ونه سپموي.
همدا راز یې له یادو مسؤلینو څخه وغوښتل، چې د نوي تعلمي کال لپاره دې پوره چمتوالی ولري او د زده کوونکو ستونزې دې په پام کې ونیسي، تر څو د وزارت د اړوندو لېسو زده کوونکي په سمه توګه خپلې زده کړې ترسره کړي.
ښاغلي بارکزي د نوي کال لپاره د خوست ولایت د قبایلو لېسې د پرانېستې او په یاده لېسې کې د زده کوونکو د شاملېدو په اړه هم خبرې وکړې او اړوند رئیسانو ته یې دنده وسپارله، چې د ۱۳۹۹ تعلمي کال لپاره دې د زده کوونکو د زده کړې ترسره کولو په موخه پرانېستل شي.
