د سمنګان ولایت په مرکز ایبک کې د قومي مشرانو ستونزې واورېدل شوې
شنبه ۱۶\۶\۱۴۴۵
د سمنګان ولایت په مرکز ایبک کې د سرحدونو، قومونو او قبایلو چارو آمر مولوي سید محمد سعید په خپل کاري دفتر کې د یاد ولایت د تیخونک سیمي له قومي مخورو او متنفذینو سره وکتل.
په دغه ناسته کې د یاد آمریت آمر ښاغلي سعید حاضرینو ته ښه راغلاست ووایه او یاد آمریت یې د قومونو ګډ کور وباله، نوموړي زیاته کړه: د سرحدونو، قومونو او قبایلو چارو آمریت د قومونو تر منځ همغږي او اتفاق را منځ ته کړي او د قومونو تر منځ د شخړو د حل او د بې اتفاقیو له منځه وړلو په برخه کې پوره هڅه کوي.
په یاده غونډه کې قومي مخورو له آمریت سره خپلې ستونزې شریکې کړې چې د ښاغلي سعید له لوري ورته اطمینان ورکړل شو چې ستونزې به یې تر اړوند مرجعو رسوي او حل لارې به ورته لټوي.
