د خلکو استازي او فرهنګي شخصیتونه د ملي یووالي او سولې په ټینګښت کې له ارزښته ډک رول لري!
دغه خبره د سرحدونو او قبایلو چارو وزیر ښاغلي محمد شفیق ګل آغا شېرزي نن دوشنبې د روان لمریز کال د کب میاشتې پر ۱۲ مه نېټه په ولسي جرګه کې د تخار ولایت د خلکو له استازې آغلې حبیبې دانش او د ننګرهار ولایت د خلکو پخوانۍ استازې او فرهنګي شخصیت آغلې صفیه صدیقي سره د کتنې په ترڅ کې څرګنده کړه.
په یاده کتنه کې، چې د وزارت مسلکي مرستیال ښاغلی ډاکټر فریدون بارکزی او د سرحدي څېړنو مرستیال ښاغلی ډاکټر محمد آصف قاضي زاده هم حاضر و، دواړو خواوو په هېواد کې د تلپاتې سولې د ټینګښت، نظام څخه د ملاتړ، د ملي یووالي په پیاوړتیا، فرهنګي او نورو د علاقې وړ موضوعګانو په اړه بحث او خبرې وکړې او په ګډو هلو ځلو یې ټینګار وکړ.
