د جوزجان په قوشتېپې ولسوالۍ کې د پېښې شخړې حل!
دوشنبه-۲۳/۱/۱۴۴۶
د جوزجان ولایت قوشتېپې ولسوالۍ په بیک سر کلي کې د پښتنو او ازبکو د دوو کورنیو ترمنځ پېښه شوې شخړه د یاد ولایت د سرحدونو، قومونو او قبایلو چارو ریاست په همغږۍ حل شوه.
دغه شخړه د طرفینو تر منځ د کرنیزو ځمکو او خپلمنځي اختلافاتو له وجهې رامنځته شوې وه، چې له مودو راهیسې یې د دواړو کورنیو ترمنځ ژور اختلافات رامنځته کړي وو، چې د سیمه ییزو قومي مخورو او د یاد ریاست د رئیس په منځګړیتوب سولې ته راضي شول او د ورورګلوۍ په فضاء کې ژوند تېرول یې غوره کړل.
هېره دي نه وي، چې د سرحدونو، قومونو او قبایلو چارو وزارت د قومي مشرانو، د شخړو د حل کمیسیونونو او ولایتي مسؤلینو په همکاري د هیواد په ټولو ولایتونو کې سلګونه لويې او وړې شخړې حل کړې او د هیوادوالو ترمنځ د اتحاد او انسجام په برخه کې کوټلي ګامونه اخلي.
