داسلام دستر پيغمبر حضرت محمد مصطفى (ص) د نېکمرغه ميلاد په مناسبت د سرحدونو او قبايلو چارو وزارت پيغام!
بسم الله الرحمن الرحيم
د سرحدونو او قبايلو چارو وزارت مقام او ټول کارکوونکي، د اسلام د ستر پيغمبر حضرت محمد مصطفى ( ص ) د نيکمرغه ميلاد له امله د هېواد او د نړۍ ټولو مسلمانانوته د زړه له کومې مبارکي وايي او د دغې مباركي ورځې په رڼا کې د افغانستان او نړۍ ټولو مسلمانانو ته د نېك عمل او یووالي غوښتنه كوي او دغې ورځ ته د اسلام د ستر پيغمبر د ميلاد او رحلت د ورځې په توګه درناوى کوي.
وزارت له ټولومسلمانو وروڼو، ټولنيزو او حکومتي بنسټونو څخه هیله کوي چې د آنحضرت معظم ميلاد د الهي کلام په ختمونو ، د بشريت د ناجي د لوړو سجاياوو په بیانولو، صدقاتو، خيراتونو او عبادتونو سره د اسلام د ستر شان پيغمبر له عاداتو او سنتونو سره سم ولمانځي.
د سرحدونو او قبايلو چارو وزارت د دې مبارکې ورځې په درناوى د هېواد په دننه او بهر له نورو اسلامي هېوادونو کې له هغو ډلو څخه، چې په جګړو او تاوتريخوالى کې بوخت دي؛ غواړي، چې په اسلامي ورورولۍ او ديني ارشاداتو سره سم په خپلو خاورو کې له جګړو او وروروژنو څخه لاس واخلي او د سولې او يووالي لاره غوره کړي.
درنښت
محمد شفيق ګل اغا شېرزى
د سرحدونو او قبايلو چارو سر پرست وزير
