د سرحدونو او قبایلو چارو سرپرست او نوماند وزیر ښاغلي محب الله صمیم نن هم د خپلو لیدنو کتنو په دوام د صرافانو اتحاديې او سوادګرۍ خونې له غړو او استازو او د پروان ولایت د پوهنتون له استادانو سره د خپل کار په دفتر کې وکتل.
راغلو استادانو، سوداګرو او مشرانو ښاغلی محب الله صمیم یو ولسي شخصیت وباله، چې د ولسونو له منځ څخه راپورته شوى او د ولسونو په ژبه پوهیږي او هغه ته یې د مبارکۍ ویلو ترڅنګ د همکارۍ ډاډ ورکړ.
ورپسې د سرحدونو او قبایلو چارو وزارت سرپرست او نوماند وزیر ښاغلي محب الله صمیم په خپلو خبرو کې وویل: دغه وزارت ولسي وزارت دی، چې دروازې يې تل ستاسو پر مخ پرانیستې دي، موږ به تل ستاسو سلامشورې اورو او په ګډه به پرمخ ځو.
