د هېواد علمي، فرهنګي او سیاسي شخصیت ارواښاد اکاډمیسن سلیمان لایق پاک روح ته دعا وشوه.
د هېواد علمي، فرهنګي او سیاسي شخصیت اکاډمیسن سلیمان لایق، چې تېر کال د کابل د ششدرک په سیمه کې د یوې چاودنې له امله ټپي شوی و ، د روان لمریز کال د زمري میاشتې پر ۱۰ مه نېټه دهمدغو ټپونو له امله د المان هېواد په یوروغتون کې ځان حق ته وسپارلو.
انا لله و انا الیه راجعون
د ارواښاد جنازه پرون کابل ته راورسېده او د هېواد د فرهنګیانو او د ارواښاد د مینه والو له خوا د یو لړ مراسمو په ترڅ کې د شهید محمد داوود خان څلوسوه بستریز روغتون ته ولېږدول شوه.
د سرحدونو او قبایلو چارو وزارت د محترم مشرتابه په استازېتوب د مقام د دفتر رئيس، د اطلاعاتو او عامه اړیکو رئيس ، د تحقیق او مطالعاتو رئيس، د معلوماتي ټکنالوژۍ رئيس د وزارت ارشدمالي سلاکار، آمرینو او یو شمېر کارکوونکو هم نن د درناوې په دغو مراسمو کې برخه واخیسته او د هغه کورنۍ غړو ته يې د وزارت د محترم مشرتابه د ژورخپګان او غمشریکۍ مراتب څرګند کړل. اروښاد ته یې د الله ج له دربار څخه د مغفرت او بخښنې، کورنۍ، دوستانو او د هېواد علمي او فرهنګي سترې کورنۍ غړو ته یې ته د جمیل صبر غوښتنه وکړه.
د یادونې وړ ده، چې اروښاد سلیمان لایق د هېواد سره بې کچه مینه درلوده، په علمي او فرهنګي ډګر کې یې ښه فعال خدمتونه د درناوي وړ او لیکلي اثار یې زموږ د هېواد د علمي او فرهنګي شتمنۍ په بډاینه کې ځانته ارزښت لري سربېره پر دې ارواښاد سلیمان لایق د سرحدونو او قبایلو چارو وزیر هم تېر شوی او د یاد وزارت سره یې د علمي بورد په برخه کې فرهنګي همکار پاتې شوی وه، چې مړینه یې د هېواد په سیاسي او علمي برخه کې لویه ضایعه ده.
ارواح دې ښاده او یاد دې تلپاتې وي
