ننګرهار ولايت ته د سرحدونو او قبايلو چارو د وزير سفر!
د سرحدونو او قبايلو چارو وزير ښاغلي محمد شفيق ګل آغا شېرزي نن، په داسې حال کې يو شمېر چارواکو او قومي مشرانو يې ملتيا کوله، د ننګرهار ولایت د خپل سفر په لړ کې له بېلابېلو مشرانو، متنفذینو، علماو، ځوانانو او بېلابېلو اقشارو له استازو سره په جوړه شويو غونډه کې ګډون او وینا وکړه.
ښاغلى شېرزي دغه راز د خپل سفر په ترڅ کې د ملي شورا د مشرانو جرګې مشر محترم فضل هادي مسلميار کورته تشريف يوړ او د هغه د مور بي بي پاک روح ته يې دعا وکړه او د خپلې خواخوږۍ مراتب يې څرګند کړل.
وروسته د سرحدونو او قبايلو چارو محترم وزير، د قومي مشر ارواښاد شيخ حاجي عبدالکريم د کورنۍ له غړو او خواخوږو سره، چې څه موده مخکې يې ددغه ولايت د خېوې په ولسوالۍ کې د جنازې پر مراسمو بريد شوى و او له امله زموږ يو زيات شمېر بېګناه هېوادوال شهيدان شول، ورغۍ او د شهيدانو پاک روح ته يې دعا او د شهيدانو وارثانو ته تسليت ووايه.
همداراز ښاغلي شېرزي د ولسي جرګې له غړي محترم نور اغا ملکزي سره په کتنه کې د هغه د زوې د شهادت له امله، چې خېوې په پېښه کې شهيد شوى، غمشريکي وکړه او د خپل خواخوږى مراتب يې وړاندې کړل.
دغه راز محترم شېرزي د قومي مشر ارواښاد ملک محمد عثمان شينوارى کور ته، چې دوه ورځې مخکې په حق رسيدلې و ، تشريف يوړ، او د خپل ژور خپګان مراتب يې څرګند او د ارواښاد پاک روح ته يې دعا وکړه!
ددغو ليدنو کتنو او فاتحو په پاي کې د شهيدانو وراثانو او وفات شويو هېوادوالو د کورنيو غړو د سرحدونو او قبايلو چارو د وزير محترم محمد شفيق ګل آغا شېرزى له راتګ، غمشريکۍ، ملي او انساني احساس او همدردۍ څخه مننه وکړه.
