د پښتونستان عالي لېسه کې د ختیځ زون یونیسیار د مرستندویه بنسټ له خوا مرسته شوې پروژه له تطبیق وروسته ګټې اخیستنې ته وسپارل شوه
د پښتونستان په عالي لېسه کې د ختیځ زون د مرستندوی بنسټ له خوا د لمریزې برېښنا پرمټ د څښاک اوبو برابرولو پروژه نن یکشنبې د ۱۳۹۸ لمریز کال د مرغومې میاشتې پر ۲۹ مه نېټه د پټې په پرېکولو سره ګټې اخیستنې ته وسپارل شوه.
په یاده غونډه کې د سرحدونو او قبایلو چارو وزارت مالي او اداري مرستیال ښاغلي شجاع الملک جلاله، د وزارت یو شمېر رئيسانو، د یاد بنسټ استازي ښاغلي زاک او د ننګرهار ولایت مرستیال والي ښاغلي تمیم عارف مهمند برخه اخیستې وه.
په دې پروژه کې د لمریزې برېښنایي وسایلو سربېره د ژورې څاه کیندل، د لېسې د تشنابونو ترمیمول او د کمپیوټرلبونو مرستې شاملې دي.
د وزارت مالي او اداري مرستیال ښاغلي شجاع الملک جلاله په خپلو خبرو کې د یادې مؤسسې له مرستې څخه مننه وکړه او هیله یې څرګنده کړه، چې یاده موسسه دې د لېسې لپاره د امبولانس او نورو کمپیوټر لبونو په برخو کې هم همکاري وکړي.
