د قبایلي مشرانو غوښتنې او وړاندیزونه واورېدل شول!
د سرحدونو او قبایلو چارو وزارت مسلکي مرستیال ښاغلي ډاکټر فریدون بارکزي نن سې شنبې د ۱۳۹۸ لمریز کال د مرغومې میاشتې پر ۲۴ مه نېټه په داسې حال کې، چې د وزارت مالي او اداري معین ښاغلی شجاع الملک جلاله او د اطلاعاتو او عامه اړیکو رئيس ښاغلی عبدالوحید خاورې هم حاضر و، له یو شمېر قبایلي مشرانو سره د خپل کار په دفتر کې وکتل.
په دې کتنه کې راغلو مشرانو د خپلو یو لړ ستونزو شریکولو ترڅنګ، د وزارت له مشرتابه څخه مننه وکړه، چې تل یې د دوی ځوانانو ته د وزارت په اړوند لېسو کې د زده کړې او په دې برخه کې د غوره میکانیزم زمینه برابره کړې ده.
همدا راز نوموړو د وزارت له مشرتابه څخه وغوښتل، چې د دوی ځوانان دې د تل په څېر د لوړو زده کړو ترسره کولو په موخه بهرنیو هېوادونو ته د بورسونو له لارې معرفي او د وزارت په اړوند لېسو کې دې د قبایلي ځوانانو د شاملیدو لړۍ پراخه شي.
ورپسې د سرحدونو او قبایلو چارو وزارت مسلکي مرستیال ښاغلي ډاکټر فریدون بارکزي په خپلو خبرو کې د یادو قبایلي مشرانو غوښتنې او وړاندیزونه پر ځای وبلل او په دې برخه کې یې د خپلو همکاریو ډاډ وکړ.
ښاغلي بارکزي له دوی څخه وغوښتل، چې د تل په څېر دې خپل ځوانان د زده کړو ترسره کولو په موخه د وزارت اړوند لېسو ته معرفي کړي.
د یادولو وړدی، چې قبایلي مشرانو د وزارت په اړوند دیوال باندې د هېواد د ملي شخصیتونو، اتلانو او ملي مشاهیرو په تېره بیا د پښتنونخوا مشاهیرو انځورونو د نقاشي کولو له امله هم مننه او قدر داني وکړه.
