د وزارت د اړوندو لېسو بریالي زده کوونکي او زيارکښ استادان به تقدیر او وستایل شي!
د سرحدونو او قبایلو چارو وزارت مسلکي مرستیال ښاغلي ډاکټر فریدون بارکزي په مشرۍ نن یکشنبې د ۱۳۹۸ لمریز کال د لیندۍ میاشتې پر ۱۰ مه نېټه په داسې حال کې، چې د وزارت یو شمېر رئیسان او د لېسو امرین هم حاضر و، د وزارت د اړوندو لېسو د بریالیو زده کوونکو، زیارکښه استادانو او په اړوندو تعلیمي مرکزونو کې د اصلاحاتو د تطبیق فعال برخه والو د ستایلو په موخه غونډه جوړه شوه.
په غونډه کې د وزارت مسلکي مرستیال وویل: د دې لپاره، چې استعدادونه پټ پاتې نه شي او د زده کوونکو ترمنځ سالم رقابت هم شتون ولري، نو باید هغه زده کوونکي، چې تل یې خپلو زده کړو ته پاملرنه کړې او په ازموینو کې یې لوړې نمبرې ترلاسه کړي او دغه راز هغه فعال کسان چې د اصلاحاتو په لړۍ کې يې فعاله ونډه اخیستې تقدیر او وستایل شي.
د دې ترڅنګ د وزارت په اړوندو لېسو کې ژور اصلاحات او مثبت بدلونونه رامنځته شوي، چې په دې برخو د استادانو رول هم له ارزښته ډک دی او د دوی هڅې هم د ستایلو وړ دي.
له همدې امله د سرحدونو او قبایلو چارو وزارت مسلکي معین ښاغلي بارکزي نن اړوندو رئیسانو او د لېسو امرینو ته لارښوونه وکړه، چې په نږدې راتلونکې کې بریالي زده کوونکي، زیارکښ استادان او د اصلاحاتو په پروسه کې فعال برخه وال د یوې شاندارې غوڼدې په ترڅ کې، چې د ولسي جرګې غړي، سیاسیون، دیني عالمان، قومي مشران او مخور هم پکې ګډون کوي تقدیر او وستایل شي.
ورپسې د غونډې ګډونوالو هم مسلکي مرستیال ښاغلي ډاکټر فریدون بارکزي ته د خپلو همکاریو ډاډ ورکړ.
