جمهور رئیس غني، د کندهار ولایت د مشرانو او ځوانانو غوښتنې او وړاندیزونه واورېدل.
د افغانستان د اسلامي جمهوریت جمهور رئیس جلالتماب محمد اشرف غني نن مازدیګر په داسې حال کې، چې د سرحدونو او قبايلو چارو وزير محترم محمد شفيق ګل آغا شېرزى هم حضور درلود، د ویډیو کنفرانس له لارې د کندهار ولایت د مشرانو، متنفذینو، د مدنې ټولنې فعالانو او ځوانانو غوښتنې او وړاندیزونه واورېدل.
دوی په دغه ویډیو کنفرانس کې د پوهنې، روغتیا، پانګونې، کرنې، بشري ظرفیت، د اوبو د مدیریت، بای پاس سړک او ښاري انکشافي پلان په برخو کې د کندهار ولایت د خلکو غوښتنې له جمهوررئیس سره شریکې کړې.
په پیل کې د کندهار ولایت د علماو شورا رئیس مولوي عبیدالله فیضاني د مدرسو جوړلو، د کندهار علماو ته د لا زیاتې پاملرنې او خلکو د امنیت د تامین په اړه خبرې وکړې.
جمهوررئیس غني د دوی د غوښتنو او ستونزو له اورېدو وروسته وویل، د کندهار د برېښنا لین د تمدید کار ۷۰ سلنه بشپړ شوی او د راتلونکي کال د سرطان/چنګاښ په میاشت کې به تکمیل شي.
هغه زیاته کړه، د ۴۰ میګاواټه لمریزې برېښنا درې پروژې بشپړې شوي دي، همدارنګه د ۹۰ ښوونځیو پر جوړلو کارروان دی او د ۷۰ ښوونځیو کارونه یې بشپړ شوي دي.
جمهوررئیس څرګنده کړه: د کندهار د اوبو د مدیریت د ارزونې پر بهیر کار شوې او له سېلابونو د مخنیوي په موخه یو پلاوی کندهار ته ځي.
د هېواد جمهوررئیس وویل، د ښاري انکشاف پلان د حکومت له لومړیتوبونو څخه دی، د کندهار د پوهنې تشکیل به د ولایت د اړتیاو پر بنسټ عیار شي او همداراز به د راتلونکې کال لپاره د متوازن معارف پراختیا په پام کې ونېول شي او د نجونو د ښوونځیو ودانولو ته به ډېره پاملرنه وشي.
جمهوررئیس غني څرګنده کړه، د کندهار ولایت د روغتیا په تشکیل کې تغییرات رامنځته کېږي او د کندهار انکشافی کنفرانس به د راتلونکي کال په پسرلي کې، په کابل کې جوړ شي.
جمهوررئیس په هره ولسوالۍ کې د جومات ودانولو ته په اشارې وویل، د علماو او د شهیدانو د وارثانو معاش ته به ډېره پاملرنه وشي.
جمهوررئیس غني د لوړو زده کړو وزارت مسوولینو ته د ښځینه وو لپاره د لیلیې ودانولو د وړاندیز لارښوونه وکړه او وې ویل، د لوړو زده کړو شورا له لورې د کندهار ځوانانو لپاره د ماسټرۍ دوه برنامې په پام کې نېول شوې دي.
جمهوررئیس وویل، په کندهار ولایت کې د امن خونو جوړولو ته اړتیا ده، د سوداګرو ستونزې دې وارزول شي او له ځوانانو دې ملاتړ وشي. هغه زیاته کړه، د کندهار خلکو په ټاکنو کې په خپل ګډون سره له جمهوریت څخه دفاع وکړه.
جمهوررئیس د ملکي تلفاتو د مخنیوي په اړه وویل، د پوځي عملیاتو په چوکاټ کې تغییر راغلی او د امنیتي او دفاعي ارګانونو مسوولینو ته زما لارښوونه تل دا وه چې ملکي وګړو ته دې هیڅ راز زیان ونه رسېږي.
