د بلخ، فارياب او سرپل ولايتونو په ځینو ولسواليو کې بېلابېلې ولسي غونډې تر سره شوې
شنبه ۲۹ صفرالمظفر ۱۴۴۷ د بلخ ولايت د سرحدونو قومونو او قبايلو چارو رياست مسؤلينو له لوري په دولت آباد ولسوالي کې د جوړې شوې غونډې پر مهال د امیرالمؤمنین حفظه الله هغه فرمانونه ګډونوالو ته تشريح شول، چې د ټولنې د ناسمو رواجونو او ناوړه دودونو د مخنيوي سپارښتنې پکې ذکر شوې دي. د دغې رابلل شوې غونډې له لارې ولسي خلکو خپلې اړينې ستونزې او غوښتنې د بلخ ولايت له ورغليو مسؤلينو سره شريکې کړې او د هغوی د حل ډاډ يې ترلاسه کړ. په ورته وخت کې د فارياب ولايت په المار ولسوالي کې هم د دغه ولايت د سرحدونو، قومونو او قبايلو چارو رياست لخوا د اسلامي اخوت او ولسي ستونزو د اورېدو په مناسبت غونډه وشوه، چې پر مهال يې قومي مشرانو خپلې بېلابېلې سيمه ييزې ستونزې د اسلامي امارت له مسؤلينو سره شريکې کړې او د هغوی د حل غوښتنه يې وکړه. د دې ترڅنګ د سرپل ولايت د سرحدونو، قومونو او قبايلو چارو آمريت په مشري په الفتح ولسوالي کې د اسلامي اخوت او د خلکو ستونزو د اورېدو غونډه ترسره شوه، چې پکې د ولسي ستونزو د اورېدو ترڅنګ خلک ګډونوالو پر يووالي او له اسلامي امارت څخه پر ملاتړ هم ټینګار وکړ، همدا راز د امیرالمؤمنین حفظه الله ۱۳ او ۱۷ ګنه فرمانونه ولوستل شول، چې د عملي کولو سپارښتنې يې هم وشوې.
