په کنړ ولايت کې لويه ولسي غونډه ترسره شوه
سه شنبه ۱۴۴۶/۵/۳
په کنړ ولایت کې د اسلامي نظام ثبات، د ولسونو د يووالي تر عنوان لاندې غونډه داسې مهال تر سره شوه پر مهال یې د سرحدونو، قومونو او قبايلو چارو وزارت د جرګو او قبایلو چارو د همغږۍ مرستیال الحاج مولوي محمد علي جان احمد، مل پلاوي، د کنړ ولايت والي، د بېلابېلو ادارو مسؤلینو، علماوو، سلګونه قومي سپين ږيرو او ځوانانو ګډون کړی وو.
قومي مشرانو د خپلو خبرو پر مهال د ا.ا.ا حاکميت خپله نيک بختي وګڼله او ددې نظام ملاتړ يې خپل مسؤليت ياد کړ دوی وويل: د کنړ ولسونو تل د دښمن پر وړاندې د خپل نظام ننګه کړې، دوی همدار راز په دغه ولايت کې د اوبو بندونو، توليدي برښنا، ځوانانو ته د کاري زمينو برابرول او ځينې نورې ستونزې يادې کړې چې د حل په موخه يې له ورغلي پلاوي غوښتنې وکړي.
ورپسې د جرګو او قبایلو چارو د همغږۍ مرستیال الحاج مولوي محمد علي جان احمد وويل: د ا.ا.ا پاليسي د اسلام موافق پاليسي ده او مسؤلين له همدې تګ لارې د خلکو ستونزو ته رسېدنه کوي نوموړي زیاته کړه: ولسونه دې د اسلامي نظام تر څنګ ودرېږي. هغه نظامونه پایدار او تلپاتې وي چې د ولسونو همکاري ورسره وي، ښاغلي احمد خلکو ته ډاډ ورکړ چې امارت ژمن دی چې د خلکو ستونزو ته د حل لارې ولټوي او ولسونو ته د هوسا ژوند زمينه برابره کړي.
همداراز د جرګو او قبایلو چارو د همغږۍ رئیس شيخ نيک محمد افغاني زیاته کړه: ا.ا.ا اقتصادي ډګر داسې ساتلی چې په نژدې راتلونکي کې به د هېواد ټول ولسونه له اسانتیاوو برخمن شي، نوموړي وویل د هیواد د آبادۍ او پرمختګ لپاره د ولسونو اتحاد او یووالي ته ډېره اړتیا ده.
د غونډې په پای کې د وزارت د اطلاعاتو او عامه اړیکو رئیس مفتي تسلیم الله حقاني او د کوچیانو چارو د اقتصادي خدمتونو رئیس مفتي لعل محمد منيب وویل: اسلامي امارت د هيواد د ابادۍ او ولسونو د هوساينې لپاره په لويو پروژو کار پيل کړی، چې ولسونه به يې له خدمتونو برخمن شي. دوی زياته کړه د پرمختيايي پروژو د چټک کار او دوام لپاره ولسي اتحاد او اتفاق ته اړتيا ده، دوی همدار راز زياته کړه: کنړ د انقلاب دروازه پاتې شوی د هر اشغالګر لپاره د جهاد غږ همدې خلکو پورته کړی نو اوس يې وخت دی چې موږ يې خدمت وکړو او د ستونزو د حل ډاډ ورکړو.
