په نیمروز ولایت کې د یوه کس د مړینې په سر را منځته شوې شخړه هواره شوه!
چهار شنبه-۲۵/۱/۱۴۴۶
د نمیروز ولایت د سرحدونو، قومونو او قبایلو چارو رئیس حاجي صالح محمد مسافر د مصلحینو په همکاري د یاد ولایت په مرکز زرنج ښار کې د دوو کورنیو ترمنځ د یوه کس د مړینې موضوع حل او دواړه لوري یې د ورورولۍ په ټغر کښېنولي دي. دغه منازعه څه موده وړاندې د یوې ترافیکې پېښې پر مهال د یوه کس د مړینې له کبله رامنځته شوې وه، چې د یاد ریاست د مسؤلینو او قومي مشرانو په هلوځلو د یوې ناستې په ترڅ کې حل شوه. د دغې ناستې پر مهال د عفوې په فضیلتونو خبرې وشوې او دواړه لوري بښنې ته راوبلل شول، په غونډه کې شریکو ټولو ګډونوالو د شخړې په حل ټینګار وکړ چې په پایله کې یې طرفین سولې ته راضي شول او یو بل ته یې بښنه وکړه. دا په داسې حال کې ده، چې د سرحدونو، قومونو او قبایلو چارو وزارت په ټولو ولایتونو کې د خپلو ریاستونو/آمریتونو او د شخړو د حل کمیسیونونو په واسطه د قومي اختلافاتو او خپلمنځي شخړو د هواري په برخه کې شپه او ورځ کار کوي، د ولسونو ترمنځ همغږۍ، یووالی او د ورورولۍ قائمول خپله وجیبه بولي.
