په ننګرهار کې د (۱۰) کلنې دُښمنۍ حل
۱۰/۱۱/۱۴۴۵
د ننګرهار ولایت شینوارو ولسوالۍ په غني خېل کوتلي سیمه کې د دوو کورنیو تر منځ د ځمکې پر سر رامنځته شوې دُښمني چې له دواړو لوریو څخه پکې ۳ تنه وژل شوي وو، تېره ورځ د امارتي اداراتو د مسؤلینو او قومي سپین ږیرو په همکارۍ په دوستۍ بدله شوه.
د یادې شخړې د حل په غونډه کې د ګڼو نورو امارتي مسؤلینو په شمول د یاد ولایت د سرحدونو، قومونو او قبایلو چارو رئیس قاري رحمت الله غازي عمر هم ګډون کړی وو. دیني عالمانو او قومي مخورو د خبرو پر مهال د ښکېلو غاړو ترمنځ په روغه جوړه ټینګار وکړ او د خلکو ترمنځ د ورورولۍ د قائمولو په برخه کې یې د اسلامي امارت ستړیاوې وستایلې.
وروسته د سرحدونو، قومونو او قبایلو چارو رئیس ښاغلي غازي عمر دواړه خواوې پخلاینې ته راوبللې ویې ویل: لکه څرنګه مو چې د دې غیور ملت په مرسته د اشغال ټغر له دې پاکې خاورې ټول کړ همداسي به د دې ولسونو په مرسته د نورو بدمرغیو ټغر هم ټولوو. د غونډې په وروستیو کې دواړه لورو یو بل ته د خوښۍ غېږه ورکړه.
