په بلخ کې یوه ۴ کلنه شخړه په دوستي بدله شوه
د بلخ ولایت د دولت آباد ولسوالۍ په قرشي ګک سیمه کې د دوو کورنیو ترمنځ ۴ کاله مخکې پېښه شوې شخړه د یادې ولسوالۍ د شخړو د حل کمېسیون، قومي سپین ږیرو او د سرحدونو، قومونو او قبایلو چارو ریاست په همغږۍ او هڅو حل شوه. د یادې دښمنۍ د حل کولو په موخه ټاکل شوي کمیسیون او قومي مشرانو له دواړو لوریو سره جلا جلا ناستې وکړې او ښکېلي غاړې یې روغې جوړې ته چمتو کړل. د مرکې پر مهال دواړه لوریو په تېرو کړنو د پښېماني څرګندولو ترڅنګ ژمنه وکړه چې له دې وروسته به له یو بل سره د وروڼو په څېر ژوند کوي.
