په بادغیس ولایت کې ۲۰ کلنه شخړه هواره شوه
د بادغیس ولایت آبکمري ولسوالۍ د آب باریک سیمې د قدي قومونو ترمنځ شاوخوا ۲۰ کاله مخکې پېښه شوې شخړه، چې له کبله یې ډېرو کسانو ته مرګ ژوبله اوښتې وه، تېره ورځ د یاد ولایت د مقام په هدایت د سرحدونو، قومونو او قبایلو چارو ریاست، قومي سپین ږیرو او دیني عالمانو په منځګړیتوب حل او په دوستي بدله شوه.
د شخړې د حل پر مهال په بدي کې ښکېلو اړخونو د مرکې غړو او مسؤلینو ته اختیار ورکړ، چې ټاکل شویو مرکچیانو له پوره څېړنې وروسته د دوی په اړه د سولې او خیر پرېکړه وکړه او نیول شوې پرېکړه یې ټولو ګډونوالو ته واوروله. په بدي کې ښکېلو لوریو د بدي پر حل خوښي څرګنده کړه، له ټاکل شوي پلاوي او جرګه کوونکو څخه یې مننه وکړه.
هېره دي نه وي، چې د سرحدونو، قومونو او قبایلو چارو وزارت د هیواد په ټولو ولایتونو کې د قومي سپین ږیرو او دیني عالمانو په مرسته د افغاني دودیزو جرګو او مرکو له لارې سلګونه لویې او وړې شخړې حل کړې او په دې برخه کې لا هم کوټلي ګامونه اخلي.
