ننګرهار کې د دوو کورنيو ترمنځ اتلس کلنه دښمني په دوستۍ بدله شوه
د ننګرهار ولایت په دره نور ولسوالي کې د معلم فضل الرحمان او معلم سید محیالدین په نومونو د دوو کورنیو ترمنځ اتلس کلنه دښمني د کونړ ولایت د سرحدونو او قبایلو چارو رئیس مولوي تحمیدالله غازي، دیني علماوو، د دره نور ولسوال، او قومي مشرانو په هلو ځلو پای ته ورسېده او دواړو کورنیو له یو بل سره روغه جوړه وکړه. د یادولو وړ ده چې د دغې دښمني په پایله کې دواړو خواو څخه درې کسانو ته مرګ ژوبله هم اوښتې وه. دواړو کورنیو پر خپلو تېرو کړنو پښيماني ښودلې او د اسلامي امارت له مشرانو څخه مننه وکړه چې له کومې معاملې پرته یې د اسلامي شریعت له مخې د دوی ترمنځ روغه جوړه وکړه. دواړو کورنیو ژمنه کړې چې له دې وروسته به له یو بل سره د سولې په فضا کې ژوند وکړي. د غونډې په پای کې ګڼ شمېر مخورو مشرانو او دیني علماوو کونړ ته د ښاغلي غازي او ورسره راغلي پلاوي له راتګ څخه مننه وکړه چې په خپلو هلو ځلو یې یاده شخړه پای ته ورسوله. دغهراز، د غونډې ګډونوالو اسلامي امارت څخه خپل ملاتړ هم اعلان کړ.
