د مزار قول اردو د ۶مې سرحدي لواء د قوماندان غوث الدين د معرفي په غونډه کې ګډون!
د سرحدونو او قبایلو چارو وزارت سرپرست محترم ملا نورالله نوري نن له غرمې وروسته په داسې حال کې چې د بلخ والي محترم ملا قدرت الله ابوحمزه او د وزارت د مقام ددفتر ریاست سرپرست محترم شيخ حضرت ولي حقاني هم ورسره مل و د مزار قول اردو د سرحدي لواء قوماندان مولوي غوث الدين د معرفي په غونډه کې ګډون او وینا وکړه.
ښاغلي نوري د يادې قول اردو د شپږمې سرحدي لواء قوماندان ته مبارکي وويله او هغه مجرب شخص وباله.
نوموړي ډ خپلو خبرو په دوام وويل: د پوځي ادارو پياوړتيا او منسجم کول د اسلامي امارت لومړيتوب دی او په دې برخه کې يې اړين اقدامات ترلاس لاندې نيولي دي.
ښاغلي نوري د مجاهدينو شل کلن جهاد او په دې لار کې د مجاهدينو قربانيو ته، چې په نتيجه کې د اسلامي نظام د برياليتوب سبب شوه هم اشاره وکړه زياته يې کړه: افغان بايد د دغه ستر الهي نعمت کفران ونه کړي او شکر وباسي او د خپل اسلامي نظام په ساتنه کې له هېڅ ډول هلو ځلو څخه ډډه ونه کړي.
ښاغلي نوري دغه راز له مجاهدينو وغوښتل، چې د بيت المال او پوځي وسايطو او وسائلو په ساتلو کې هلې ځلې وکړي.
