د ځدراڼو قوم ټولنیزې شورا له مشرتابه سره ناسته!
د سرحدونو او قبایلو چارو وزیر ښاغلي محب الله صمیم نن غرمه د ځدراڼو قوم د ټولنیزې شورا له مشر ښاغلي الحاج مارک ځدراڼ او د خوست او پکتیا ولایتونو له یو شمېر قومي مشرانو او ځوانانو سره وکتل او د دوی ستونزې یې واورېدې.
په دې کتنه کې ښاغلي ځدراڼ په بېلابېلو برخو کې د یادې شورا د کړنو او فعالیتونو په اړه معلومات وړاندې او خپلې یو لړ سیمه ییزې ستونزې یې شریکې کړې. دغه راز یې د قومونو په یووالي او په دې برخو کې د هر راز همکاریو ډاډ ورکړ.
ورپسې ښاغلي محب الله صمیم د یادو مشرانو او ځوانانو ستونزې پر ځای وبللې او د دوی له هڅو او هلو ځلو څخه یې مننه وکړه، چې د سولې او ملي یووالي د ټینګښت او د نظام د ملاتړ په موخه یې ترسره کړي او د خپلو ملي او امنیتي ځواکونو ترڅنګ ولاړ دي.
