د کمال خان بند د پرانیستې په مناسبت د سرحدونو او قبایلو چارو وزارت د مبارکۍ پیغام!
له مودو مودو را هیسې افغان باتور او په هېواد مین ولس په دې هیله او ارمان و، چې په هېواد کې یې لویې ملي پروژې او بنسټیز کارونه ترسره شي ، دا ډول هیلې یې پر ځای او غوره ځکه دي، چې زموږ هېواد او بل هر هېواد، چې وغواړي له وروسته پاتې حالت څخه د پرمختګ پر لور پړاوونه ووهي، همدې او دې ته ورته پروژو تطبیق ته اړتیا لري.
د کمال خان بند چې نن د افغانستان د اسلامي جمهوریت د جلالتماب جمهور رئیس محمد اشرف غني لخوا د لوړ پوړو دولتي چارواکو او خلکو په ګډون پرانیستل شو، یوه ملي او تاریخي لاسته راوړنه ده. هغه لاسته راوړنه، چې د هر هېوادپال افغان زړه ته خوښي وربښي او روښانه راتلونکي ته یې هیله من کوي
یاد بند چې د (۱۱۰) میلیونه امریکایي ډالروپه لګښت جوړشوی دی د (۵۲ )میلیونه متره مکعبه اوبود زخیره کولو(۱۷۴) زره هکتاره کرنیزې ځمکې د خړوبولو، ( ۹) میګاواټه برښنا د تولید ظرفیت لري، چې د صنعت ، کرنې اومالدارۍ په وده او پیاوړتیا کې مهم رول لري.
د سرحدونو او قبایلو چارو وزارت د کمال خان بند پرانیستل کېدل د پرمختګ او ځان بسیاینې پر لور د مخ ته تګ پیلامه بولي، واقعا یوه د قدر وړ او له ارزښته ډکه لاسته راوړنه ده. د پرانیستل کېدوله امله یې ټولودرنوهېوادوالوته مبارکي وایو اود دا ډول نورو پروژو د تطبیق او پرانیستلو هیله من او ورسره ملاتړی او همکار دی.
دغه راز هغو مېړنیو ته، چې له دې بند څخه د دفاع او ساتنې په لار کې د هېواد د پرمختګ د دښمنانو له خوا په شهادت ورسېدل د فردوس جنت دعا کوو، درنو کورنیو ته یې د زړه صبر غواړو د هغوی قرباني ددې هېواد او ولس لپاره د هوساینې پیغام و.
له خپل درانه ولس څخه به مو غوښتنه دا وي، چې د ملي پروژو له تطبیق څخه ملاتړ او ساتنه وکړي او په یووالي د ګران هېواد ودانۍ او سمسورتیا ته مټې راونغاړي، اوبه زموږملي شتمني اومدیریت یې دهېواد لپاره سیاسي اواقتصادي ګټې لري.
د پرمختللي، ودان او سوکاله افغانستان په هیله!
محب الله صمیم
د سرحدونو او قبایلو چارو وزیر
