قومي مشران او مخور باید د ملي یووالي لیکې پیاوړې او په دې برخه کې له دولت سره اوږه په اوږه کار وکړي!
دغه څرګندونې د سرحدونو او قبایلو چارو وزیر ښاغلي محب الله صمیم نن له غرمې مخکې د نیمروز ولایت د خلکو له استازې اغلې فریدې حمیدي او د بېلابېلو ولایتونو له یو شمېر قومي مشرانو، مخورو او ځوانانو سره په کتنه کې وکړې.
په دې کتنه کې راغلو مشرانو او ځوانانو خپلې یو لړ غوښتنې او سیمه ییزې ستونزې، چې په ځانګړي توګه د ښوونې او روزنې په برخه کې وې شریکې کړې او په بېلابېلو برخو کې د وزارت هڅې او لاسته راوړنې د قدر وړ وبللې.
دغه راز د خلکو استازې او قومي مشرانو په خپلو سیمو کې د موجوده نظام په ملاتړ د ولسونو د هڅولو او له وزارت سره د دوی د همغږي کولو ډاډ ورکړ.
ورپسې ښاغلي محب الله صمیم د خپلو خبرو په ترڅ کې د یادو قومي مشرانو او ځوانانو ستونزې پر ځای وبللې وې ویل: د ولسونو ملاتړ او همکاري د نظام د لا پیاوړتیا لامل کېږي، ځکه چې خلک اوس د نظام په ارزښت ښه پوهیږي او د هېواد او خلکو په ګټه یې بولي.
ښاغلي صمیم زیاته کړه، چې د خلکو له استازو او قومي مشرانو مو غوښتنه داده، چې همداسې په یو واحد صف اوسئ او ولسونه ملی یووالي ته وهڅوي او د دوی ترمنځ د سولې فضا پیاوړې کړي.
