له پامیري ځوانانو او مخورو سره کتنه!
د سرحدونو او قبایلو چارو وزیر ښاغلي محب الله صمیم نن له غرمې مخکې د بدخشان ولایت د پامیر سیمې له یو شمېر ځوانانو او مخورو سره د خپل کار په دفتر کې وکتل.
په دې کتنه کې راغلو ځوانانو او مخورو د خپلو یو لړ سیمه ییزو ستونزو شریکولو په ترڅ کې وویل: په سیمه کې مو د کلینیک، ښوونځیو او سړکونو نه شتون له ستونزو سره مخه کړي یو هیله من یو، چې په دې برخو کې راسره د وزارت مشرتابه همکاري وکړي او زموږ غوښتنې له اړوندو ادارو سره د حل په موخه شریکې کړې.
ورپسې ښاغلي محب الله صمیم د یادو ځوانانو ستونزې پرځای وبللې وې ویل: د سرحدونو او قبایلو چارو وزارت د ټولو مېشتو درنو قومونو ګډ کور دی تاسو هرکله کولای شې، چې خپلې ستونزې د حل په موخه د وزارت له مشرتابه سره شریکې کړئ د پامیر سیمې اوسیدونکي د دې هېواد اصیل بچیان دي او ستاسې ستونزې د اړوند ادارو پورې رسول زموږ مسؤلیت دی.
