له بېلابېلو قومي مشرانو او مخورو سره کتنه!
د سرحدونو او قبایلو چارو وزارت سرپرست او نوماند وزیر ښاغلي محب الله صمیم نن سه شنبې د ۱۳۹۹ لمریز کال د وږي میاشتې پر ۲۵ مه نېټه د بېلابېلو قومي مشرانو، مخورو او ځوانانو سره د خپل کار په دفتر کې وکتل.
په دې کتنه کې، چې د وزارت مرستیالان هم حاضر و، راغلو قومي مشرانو او مخورو ښاغلي محب الله صمیم ته د سرحدونو او قبایلو چارو وزارت د سرپرست او نوماند وزیر په توګه د ټاکل کېدو له امله د مبارکي ویلو ترڅنګ یې د موجوده نظام څخه بشپړ ملاتړ څرګند او په چارو کې یې ورته د بریاوو هیله وکړ.
همدا راز نوموړو ښاغلی صمیم یاد وزارت ته وړ او تجربه کاره شخص وباله او د عزت پګړې یې ورپه سر کړه.
ورپسې د سرحدونو او قبایلو چارو وزارت سرپرست او نوماند وزیر ښاغلي محب الله صمیم د یادو قومي مشرانو او مخورو له راتګ څخه مننه وکړه وې ویل: چې د ولس لپاره خدمت کول ویاړ ګڼم او تل به د دې دردېدلي ولس په چوپړ کې یم.
