د وزارت د اړوندو لېسو زده کوونکو لپاره د انلاین زده کړو د سیسټم پرانېسته!
په هغې غونډه کې، چې نن دوشنبې د ۱۳۹۹ لمریز کال د وري میاشتې پر ۱۹ مه نېټه د وزارت مسلکي مرستیال ښاغلي ډاکټر فریدون بارکزي په مشرۍ د وزارت اړوندو لېسو د زده کوونکو لپاره د انلاین سیسټم د پرانېستې په موخه جوړه شوې وه، د وزارت یو شمېر رئیسانو، آمرینو او د لېسو ښوونکو پکې ګډون درلود.
د غونډې په پیل کې د وزارت مسلکي مرستیال ښاغلي بارکزي د کرونا وایروس د جدي نیولو په تړاو خبرې وکړې او د اړوندو لېسو زده کوونکو ته په انلاین ډول د زده کړو د سیسټم د پرانېستې په موخه یې، چې مخکې په یاد سیسټم د موظفې کمېټې له خوا کار شوی وه نن یې رسما د ښوونکو په شتون پرانېست وې ویل: دا چې د کرونا وایروس د خپریدو خطر نور هم زیات شوی او د دې لپاره، چې د زده کوونکو پر زده کړو هم منفي اغیزې ونه لري نو باید په انلاین ډول دې د واټساپ ګروپ او یوټیوب چینل له لارې ښوونکي خپل لکچرنوټونه له زده کوونکو سره د هغوی ستونزو ته په کتو شریک کړي او د هر ولایت زده کوونکي د همغه ولایت د سرحدونو او قبایلو چارو ریاست له لورې په یاد پروګرام کې لینک وي او خپل نومونه دې ثبت کړي که په دې برخه کې تخنیکي ستونزې ولري نو د اړوند ریاست له لورې د وزارت د ښوونې او روزنې ریاست سره پر خپل وخت شریکوي.
ښاغلي بارکزي زیاته کړه دا چې ځینې زده کوونکي یاد سیسټم ته لاس رسې نه لري نو دوی کولای شي، چې د نورو ټولګیوالو څخه یې، چې یو بل سره همغږي ولري پر خپل وخت بې له کومې ستونزې یې ترلاسه کولای شي او که څوک انټرنېټ ونلري بیا د شمېر د معلومیدو وروسته به کوښښ وشي چی د فلش په ذریعه او یا چاپې ډول د ولایتی ریاستونو څخه تر لاسه کړي.
د غونډې پای کې د ځینو تخنیکي ستونزو او حل لارو چارو ترڅنګ یو شمېر رئيسانو هم خپل نظریات او وړاندیزونه شریک کړل او ټینګار پر دې وه، چې په دې برخه کې دې باید د بشپړې همغږۍ څخه کارواخیستل شي.
يادونه : زده کوونکي کولاى شي د يو ټيوب لاندې چينل سپسکرايپ او په انلاين ډول خپلې زده کړې وکړي
