د شیخ محمد روحاني قوم د سرتاسري شورا په غونډه کې ګډون!
د سرحدونو او قبایلو چارو وزارت د جرګو او قبایلي چارو د همغږۍ مرستیال ښاغلي محمد یعقوب احمدزي د روان کال د لیندۍ میاشتې په ۶ مه نېټه د شیخ محمد روحاني قوم د سرتاسري شورا په یوه لویه غونډه کې، چې د هېواد په روانو حالاتو، د سولې پروسې د ملاتړ او د ولسمشرۍ ټاکنو د پايلو د زراعلان په موخه جوړه شوې وه او د بېلابېلو ولایتونو قومي مشرانو او دیني عالمانو پکې حضور درلود ګډون وکړ.
په غونډه کې قومي مشرانو او دیني عالمانو په ملي یووالي، د سولې په ټینګښت او د موجوده نظام څخه په ملاتړ ټینګار وکړ وې ویل: موږ ته سوله او په هېواد کې د ملي پروژو تطبیق، چې د هېواد او خلکو د سوکالۍ سبب ګرځي لومړیتوب لري د شیخ محمد روحاني قوم د سرتاسري شورا موخه هم د ملي یووالي روحیې پیاوړي کول، د ژبني او قومي توپیرونو له منځه وړل دي.
نوموړو همدا راز د ټاکنو د خپلواک کمېسیون له مسؤلینو وغوښتل، چې د ولسمشرۍ ټاکنو پایلې دې زر ترزره اعلان او ولس ته دې بریالی نوماند وروپېژني.
ورپسې د سرحدونو او قبایلو چارو وزارت د جرګو او قبایلي چارو د همغږۍ مرستیال ښاغلي محمد یعقوب احمدزي خبرې وکړې وې ویل: زموږ عزت په مشوره او بریالیتوب مو په یووالي کې دی هغه قومونه چې یووالی نه لري او اختلافاتو ته لومړیتوب ورکوي، د ناکامۍ سره مخ کیږي او په یووالي سمبال قومونه تل د پرمختګ او سوکالۍ په لټه کې دي.
ښاغلي احمدزي زیاته کړه، راځئ چې د نظام د ټینګښت لپاره په ګډه سره کار وکړو او خپله خوښي د نورو په خوښۍ کې ووینو.
د یادونې وړ دی، چې په دې غونډه کې د یادې شورا نوی مشر هم وټاکل شو.
