د کندهار د يوشمېر قومونو له قومي مشرانو او مخورو سره د عامه پوهاوي غونډه جوړه شوه .
د سرحدونو او قبایلو چارو وزیر ښاغلي محمد شفیق ګل آغا شېرزي د روان لمریز کال د وږي د میاشتې په ۳۱ مه نېټه د کندهار د ډنډ ولسوالۍ د حاجي بابا په زيارت کې د کندهار ښار او بیلا بیلو ولسواليو په سلګونو قومي مشرانو او سپين ږيرو سره د ولسمشريزو انتخاباتو په اړه د عامه پوهاوي په جوړې شوي غونډې کې ګډون وکړ.
د غونډې په پیل کې ښاغلي شیرزي وويل، چې انتخابات د هېواد په دې اساسو شرايطو کې له روانو جګړو څخه د ژغورنې يوازنۍ لاره ده، نو له همدې امله ولس بايد د سولې او امنيت د ټينګښت لپاره په انتخاباتو کې پراخ ګډون وکړي او خپل راتلونکی ولسمشر وټاکي.
د سرحدونو او قبایلو چارو وزیر ښاغلي محمد شفیق ګل آغا شېرزي زياته کړه موږ انتخابات د قوي او مشروع دولت او نظام د جوړولو لپاره غواړو، څومره، چې دولت او نظام قوي وي په هم هفه اندازه به د سولې او امن د ټينګښت لپاره جدي کار وکړي، خو قوي دولت او نظام هغه وخت رامنځته کيږي، چې تاسو ټول نر او ښځي په انتخاباتو کې پراخ ګډون وکړئ او خپله رايه ورکړئ.
ورپسې د انتخاباتو په اړه د عامه پوهاوي په جوړه شوی غونډه کی قومي مشرانو د ولسمشريزو انتخاباتو په اړه د سرحدونو او قبایلو چارو د وزیر ښاغلي محمد شفيق ګل اغا شېرزي خبرې پر ځای وبللې او ژمنه يې وکړه، چې د سولې او امنیت د تامین او د قوي دولت او نظام لپاره به د کندهار ټول قومي مشران ټول ولس هڅوي، چې د خپل ولسمشر د ټاکلو لپاره په ولسمشریزو ټاکنو کې ګډون وکړي، رايې ورکړي او يو داسې ولسمشر وټاکي، چې د سولې او امن په ټينګښت سره هېواد له روانو ستونزو څخه وژغورې.
