د پکتیکا ولایت د سرحدونو او قبایلو چارو ریاست له لورې د پښتنو او بلوڅو وروڼو سره د پیوستون ورځ ولمانځل شوه!
دغه څرګندونې د پښتنو او بلوڅو د پیوستون د ورځې لمانځنې په مهال د پکتیکا ولایت قومي مشرانو وکړې .
په دې هکله جوړه شوې غونډه کې د پکتیکا ولایت مرستیال والي انجنیر شیربادشاه اورګوني ، د ادارو یو شمېر رئیسانو ، قومي مشرانو ، علماَکرامو او ځوانانو ګډون کړی و.
غونډه د قرآنکریم د څو آیتونو په تلاوت سره پیل شوه ، وروسته د هیواد ملي سرود وغږول شو، ورپسې د پکتیکا ولایت د سرحدونو او قبایلو چارو رئیس خان محمد پکتین په خپله د ښه راغلاست وینا کې د پښتنو او بلوڅو د پیوستون د ورځي په تاریخي لرلید لنډه رڼا واچوله او زیاته یې کړه چې دغه ورځ له ۱۳۲۸ کال یعني له تېرو اویا کلونو څخه د پغمان د تاریخي جرګې د جوړیدو څخه راوروسته د افغانستان د حکومت او ولسونو له لورې هرکال په شور او ولولو سره لمانځل کیږی ، چې په لمانځنې سره یې زموږ د قومونو ترمنځ د یووالي او ورورولي جذبه لاپیاوړې کیږی ، او زموږ د ولس تاریخی او ملي داعیې په هکله زموږ اراده لا غښتلې کیږی ، د سرحدونو او قبایلو چارو رئیس د خپلې وینا په پای کې د پکتیکا ولسونه او قومي مشران لا یووالي ته راوبلل او له هغوی څخه یې غوښتنه وکړه چې په ټولو ملي پروسو کې خپل بنسټیز رول ادا کړی ، د سولی په برخه کې خپل ټاکل شوې حکومت ته ښې مشورې ورکړي ، همدارنګه په راتلونکو ولسمشریزو ټاکنو کې پراخه برخه واخلي.
ورپسې د پکتیکا ولایت مرستیال والي ښاغلي انجنیر شیربادشاه اورګوني په خپله وینا کې د پښتنو او بلوڅو وروڼو ترمنځ تاریخي ورورولي او یووالي ته اشاره وکړه او ویې ویل چې د افغانستان په تاریخ کې ټول قومونه تل په ښه او بده ورځ د یو بل په څنګ کې دریدلي دي او خپله وروولي یې تل دوامداره ساتلې ده ، او زیاته یې کړه چې زموږ بریا زموږ په یووالي کې ده او موږ تل له خپلو وروڼو قومونو سره یو او د هغوی له حقوقو څخه به دفاع کوو ، اورګوني د پکتیکا ولسونه او قومي مشران یووالي او په راتلونکو ولسمشریزو ټاکنو کې پراخه برخه اخیستنې ته راوبلل ، او ویې ویل چې که چیرته تاسو غواړئ چې ښه حکومت ولرئ نو راشئ خپله یې وټاکئ او دغه فرصت تاسو په هر پنځو کلونو کې درکول کیږي ، چې تاسو باید ترینه سالمه ګټه واخلئ.
وروسته بیا د پکتیکا ولایت د اطلاعاتو او کلتور رئیس ښاغلي امان الله خپلواک په خپله وینا کې د پښتنو او بلوڅو د پیوستون ورځ یوه مهمه او تاریخي ورځ وبلله او زیاته یې کړه چې دا ورځ زموږ لپاره د خپلو محرومو وروڼو پښتنو او بلوڅو سره د خواخوږي او یووالي ورځ ده ځکه هغوي چې له تیرې یوې پیړئ څخه په محرومیت او د ژوند له خپلو لمړنیو حقوقو څخه بې برخې دی ، دوی زموږ همدردی او همغږی ته اړتیا لری او ویې ویل چې پښتنو او بلوڅو تل د ډیورنډ پورې غاړه د خپلو حقوقو څخه د دفاع غږ اوچت کړی دی او په دې لاره کې یې زیاتي قربانۍ ورکړیدی لکه باچاخان بابا ، عبدالصمدخان ، اکبربګټی او نورو په زرهاو پښتنو او بلوڅو په دې لاره مبارزه کړي ده.
ورپسې د جنوبي قومونو د یووالي شورا رئیس حاجي سید محمد خان خبرې وکړي او د پښتنو او بلوڅو د یووالي ورځ یې د افغانستان د ټولو قومونو لپاره د یووالی او ورورولي ښه موقع وبلله او زیاته یې کړه چې موږ همیشه د خپلو وروڼو قومونو سره په ځانګړې توګه د ډیورنډ فرضي کرښې پورې غاړي قبایلې سیمو پښتنو او بلوڅو وروڼو سره د یووالي غږ کړی او کوو یې او د هغوی له حقوقو څخه ملاتړ کوو او په څنګ کې یې ولاړ یو.
له هغه وروسته د پکتیکا د کټواز سیمي قومي مشر الحاج ګلاخان په خپله وینا کې د افغانستان ټولو ولسونو ته د دغې ویاړلې ورځي مبارکي وویله او زیاته یې کړه چې ددغې ورځی لمانځنه زمونږ تاریخي ویاړ دی او موږ له خپلو بلوڅو او پښتنو وروڼو سره د تاریخ په اوږدو کې ملاتړي پاتي شوي یو ، او اوس یې هم ملاتړ کوو . هغه زیاته کړه چې ولسونو د ملي ورځو په لمانځنه کې باید تل برخه واخلي او تل سره راټول شي ترڅو خپل تاریخ ژوندی وساتي ، ورپسې د پکتیکا ولایت یوتن قومي مشر مدثرلنګرخېل خبري وکړي او د افغانستان ټول قومونه یې یووالي او د خپلې تاریخي عنعني جرګو مرکو د لاپراختیا او غښتلتیا دودولو ته راوبلل .ورپسې یوه ملي ترانه وغږول شوه چې :
اې زما وطنه د لعلونو خزانې زما
ستا هره دره کې دي د تورو نښانې زما
وروسته د افغانستان د سولی کاروان مشر ښاغلي محمد اقبال خیبر وینا وکړه او له خپلو محرومو وروڼو قومونو پښتنو او بلوڅو سره یې د همدردۍ اظهار وکړ او زیاته یې کړه د بلوڅو له ستر مبارز مشر اکبرخان بګټی او نورو بلوڅو او پښتنو مبارزینو سره شوي ظلمونه د هیرولو نه دي ، او موږ به خپلو وروڼو قومونو ته د خپلو حقونو تر رسېدو پوري هیڅ کله چپ پاتي نه شو.
په آخر کې غونډه د مولوی صاحب غازي لخوا د سولئېز ، سرلوړي ، سوکاله او متحد لوی افغانستان په دعایې سره پای ته ورسېده.
