د پکتيا ولايت ځاځي اریوب او ډنډ پټان ولسوالیو ميشتو خلکو ستونزې د وزارت له مرکزي کمېټې سره د يوې ناستې پرمهال شريکې شوې
د پکتيا ولايت د ډنډ پټان او ځاځي اريوب ولسواليو د مېشتو خلکو د ستونزو د څېړلو او حل په موخه د جوړې شوې کمېټې لخوا راټولې شوې ستونزې د سرحدونو، قومونو او قبايلو چارو وزارت د مرکزي کمېټې سره چې د یاد وزارت د سرحدي پلټنو معین الحاج مولوي محمد اسماعیل غزنوي یې مشري کوله په ناسته کې شريکې شوې.
د دغې ناستې پر مهال چې د پکتیا ولایت د سرحدونو، قومونو او قبايلو چارو رئیس او د وزارت یو لړ رئیسانو شتون درلود د یادو ولسواليو د مېشتو خلکو راټولې شوې ستونزې له مرکزي کمېټې سره شریکې شوې او له ارزونې وروسته یې مسؤلينو ته لازمو چارو سپارښتنې وشوې.
يادې ستونزې چې د پکتيا ولايت د مرستيال والي شيخ انعام الله صلاح الدين په مشرۍ د کمېټې مسؤلينو له لوري را غونډې شوې وې چې د سړکونو، روغتونونو، ښوونځيو، مدرسو، مخابراتي شبکو، پلونو، استنادي ديوالونو او د څښاک د پاکو اوبو ترڅنګ ځيني نورې اړینې چارې پکې شاملې وې. د دغو ستونزو او پروژو د تطبیق او د چارو د پرمختیا لپاره به په مناسبت وخت کې اقدامات ترسره شي.
