په زابل ولايت کې د دوو قومونو ترمنځ شپږ کلنه شخړه هواره شوه.
پنج شنبه ٧/ربیع الثانی/١٤٤٦
د سرحدونو، قومونو او قبایلو چارو د وزیر الحاج ملا نورالله نوري او د ولایتي ادارې په لارښوونه او هڅو د زابل ولایت مرکز قلات اړوند ملایانو (کاریزګي) کلي کې د دوو قومونو ترمنځ هغه شپږ کلنه شخړه حل شوه چې دوه تنه پکې وژل شوي او څلور نور پکې ټپیان شوي وو.
دغه شخړه چې د دواړو خواوو ترمنځ یې لوی قومي اختلافات رامنځته کړي وو او تر منځ یې د روغې جوړې هڅې شوې وې، خو بیا هم د یو لړ جنجالونو له امله ناحل پاتې وه، د سرحدونو، قومونو او قبایلو چارو وزیر الحاج ملا نورالله نوري د خپل سفر په ترڅ کې له طرفینو سره وکتل، هغوی روغې جوړې ته چمتو کړل او مصلحین یې وټاکل تر څو د یادې شخړې څېړنه وکړي او د حل لارې چارې ورته ولټوي.
تېره ورځ د سرحدونو، قومونو او قبایلو چارو وزارت د دفتر د رئیس حاجي ملا نیاز محمد تقي، د زابل ولایت والي الحاج مولوي حزب الله افغان، د علماوو شورا رئیس مولوي عزیز الله طیب، د شاجوی ولسوالي ولسوال خالد اخندزاده، دیني علماوو، قومي مشرانو او د اسلامي امارت یو لړ مسؤلینو په شتون کې فیصله ابلاغ شوه او د یوې عادلانه فیصلې په ترڅ کې یاده شخړه حل او فصل شوه.
ښکېلو قومونو د سرحدونو، قومونو او قبایلو چارو وزارت، ولایتي ادارې، علماء شورا او قومي مخورو لخوا د شوې فیصلې هرکلی وکړ او د دوی ترمنځ یې د منصفانه پرېکړې له مخې یو بل وبښل او دغه شپږ کلنه له ژورو اختلافاتو ډکه دښمني یې په دوستۍ بدله شوه.
