په پکتیا ولایت کې ډېورنډ فرضي کرښې ته د څېرمه خلکو د ستونزو د تشخیص او تثبیت په موخه کمېټه جوړه شوه!
دوشنبه ۲/صفر المظفر/۱۴۴۶
د سرحدونو، قومونو او قبایلو چارو وزیر الحاج ملا نورالله نوري د امیرالمؤمنین حفظه الله تعالی د حکم پر بنسټ ډیورنډ فرضي کرښې او نورو سرحدي پولو ته د څېرمه ولایتونو په اطرافي ولسوالیو کې د خلکو د لومړنیو ستونزو د تشخیص او تثبیت لپاره د کمېټې د جوړېدو په موخه پکتیا ولایت ته سفر وکړ.
ښاغلي نوري د دغه سفر پر مهال د پکتیا ولایت د مرستیال والي مولوي انعام الله "صلاح الدین" په شمول د کلیو پراختیا او بیا رغونې، اوبو او انرژي، عامې روغتیا، مخابراتو او معلوماتي ټکنالوجۍ، ټولګټو چارو، پوهنې او سرحدونو او قبایلو چارو ریاستونو له رئیسانو او د سرحدي ولسوالیو له ولسوالانو او په یادو ولسوالیو کې د دفاع وزارت له مسؤلینو سره ناسته وکړه، د ناستې په ترڅ کې یې د مرستیال والي په مشري د یادو ارګانو له مسؤلینو څخه ګډه کمېټه جوړه کړه او دنده یې ورته وسپارله چې ډېورنډ فرضي کرښې ته په څېرمه ولسوالیو کې د خلکو اړینې ستونزې تشخیص او تثبیت کړي.
ښاغلي نوري ګډونوالو ته د ناستې په ترڅ کې د مشرتابه مقام حکم روښانه کړ او د غونډې له ناستو مسؤلینو څخه یې د اطرافي ولسوالیو د خلکو د ستونزو د تشخیص او تثبیت په برخه کې د شفافیت غوښتنه وکړه. نوموړي په خپلو خبرو کې زیاته کړه " په تېر شل کلن جهاد کې دې خلکو له موږ سره مرسته کړې ده جهاد یې راسره کړی دی، اوس زموږ مسؤلیت دی چې خدمت یې وکړو او ضروري ستونزې یې حل کړو"
د نوري له دي سفر وروسته به د دغو کمېټو د کارونو په پایله کې د ډېورنډ فرضي کرښې او په سرحدي ولسوالیو کې د خلکو مشکلات تشخیص او په نښه شي او عملي کارونه به یې د سرحدونو، قومونو او قبایلو چارو وزارت د یوې ځانګړې کړنلارې په اساس پیل شي.
د یادونې وړ ده، چې د امیرالمؤمنین حفظه الله تعالی د یاد حکم پر اساس په کنړ، نورستان او ننګرهار ولایتونو کې هم ورته کمېټې جوړې شوې دي، چې عملا هغلته د اطرافي ولسوالیو د خلکو ستونزې تشخیص او تثبیتوي.
