د وزارت لېسو ته د زده کوونکو د جذب ازموینه واخیستل شوه
۱۱/۱۰/۱۴۴۵
د ۱۴۰۳ هـ ل کال لپاره د سرحدونو، قومونو او قبایلو چارو وزارت درې ګونو رحمان بابا، خوشحال خان او پیرمحمد کاکړ) عالي لېسو ته د زده کوونکو د شمولیت متفرقه ازموینه د وزارت د غونډو په تالار کې واخیستل شوه چې پر مهال یې له مختلفو ولایتونو څخه ۸۱ تنو زده کوونکو ګډون کړی وو. یاد زده کوونکې چې د هیواد له ټولو ولایتونو، لرې پرتو او محرومو ولسوالیو څخه دي، د خپل سهم او په ازموینه کې د ترلاسه کړیو نمرو په اساس به د وزارت دریو واړه لېسو ته جذب او لیستونه به یې له پایلو سره یوځای د وزارت له ویب پاڼې خپاره شي. د سرحدونو، قومونو او قبایلو چارو وزارت هڅه کوي چې د هیواد د سرحدي او له زده کړو بې برخو سیمو زده کوونکو ته د زده کړې اسانتیا او غوره درسي چاپیریال را منځته کړي.
