( افغانستان له مختلفو قومونو جوړ هيواد او وګړي يې د ملي وحدت تر اصل لاندې د يوه اسلامي نظام او يوه امير اطاعت کوي)
سه شنبه ۱۵ جمادلاول ۱۱۴۵
د سرحدونو، قومونو او قبايلو چارو سرپرست وزير الحاج ملا نور الله نوري نن سه شنبه د هېواد د بېلابېلو ولایتونو څخه د راغلو بلوڅ قوم له مشرانو، دینی عالمانو او ځوانانو سره د وزارت د کنفرانسونو په تالار کې وکتل.
په دې کتنه کې یو شمېر دیني عالمانو، قومي مشرانو او ځونانو په خپلو خبرو کې ځوانانو ته د کار موندنې او د بلوڅي فرهنګ د بډایني لپاره د هڅو او په دې برخه د اسلامي امارت د همکارۍ او د بلوڅ قوم د غصب شویو ځمکو د بيرته استرداد او ځايي ستونزو په حلولو کې يې پر ځانګړې پاملرنه ټینګار وکړ.
راغلو مشرانو او ديني عالمانو له اسلامي امارت څخه خپل هر اړخيز ملاتړ څرګند کړ او په اقتصادي پياوړتيا کې يې د بلوڅو قوم رول له ارزښته ډک وباله او په هره برخه کې یې له اسلامي نظام سره همکاري خپله فریضه وګنله.
ورپسي د سرحدونو، قومونو او قبايلو چارو سرپرست وزير ښاغلي الحاج ملانور الله نوري افغانستان له قومونو څخه جوړ هېواد یاد کړ ویې ویل دلته قومونو لويو امپراتوریو ته ماتي ور کړې، حکومتونه یې جوړ کړي، ملاتړ ورڅخه کوی او همدا قومونه دي چې يو نظام د بریا او استقرار پر لور بيايي .
ښاغلي نوري زیاته کړه چې په تیرو دوو کلونو نظام له هره پلوه پیاوړی شوی ، ملکي او نظامي ادارې فعالې اوچارې یې په ګړندیتوب سره روانې دي او هېواد یې په هره برخه کې د ترقۍ او پرمختګ په لور ګامزن کړی، چې ان شا الله ورځ تربلې به افغانستان د ځان بسياينې په لور وړاندې ځي.
په پای کې د یادو قومي مشرانو له لوري سرپرست وزیر ته د افغاني درانه دود له مخې چپنه پر اوږو او لنګۍ پر سر ور و تړل شوه.
