د هرات له فرهنګ دوستو خلکو سره همغږي پکار ده!
الله اکبر. الله اکبر. الله اکبر.
نن د هرات فرهنګ دوستو او حماسه جوړوونکو خلکو د الله اکبر تکبير په نعرو سره د ترهګرو، د دين او سولې دښمنانو او د هغوی د پلويانو په وړاندې خپله کرکه او نفرت څرګند کړ.
د هرات د ښځو او ماشومانو په ګډون ټول ولسونه په داسې حال کې چې په وسلو سمبال وو، د خپلو کورونو بامونو ته وختل او د دين د ټکه دارانو او جعلي مسلمانانو پر وړاندې يې خپله کرکه وښوده.
اوس په ټول هېواد کې ددغه شان ملي پاڅونونو جذبه په افغانانو کې راټوکېدلې او لرې به نه وي، چې مکار دښمن ته د غاښ ماتوونکی ځواب درس ورکړل شي.
د سرحدونو او قبایلو چارو وزارت چې د ټولو ولسونو ګډ کور دی، په ولسونو غږ کوي، چې د هرات له فرهنګ دوستو خلکو سره همغږي شي او په ټول هېواد کې د اجيرو ترهګرو او د هغوی د پلويانو پرخلاف د الله اکبر په نعرو سره ودريږي او له خپلې پاکې خاورې څخه يې د تل لپاره نيست او نابود کړي.
