د غوث خېبري د زوکړې د ۹۰ یمې کالیزې په مناسبت د سیمینار جوړولو لپاره د علمي کمیسیون غونډه!
د سرحدونو او قبایلو چارو وزارت مسلکي معین ښاغلي محمد آصف ننګ په مشرۍ د هېواد د نامتو څېړونکي، تاریخپوه او ژورنالست ښاغلي غوث خېبري د ۹۰ یمې کلیزې په مناسبت یو ورځنی علمي - تحقیقي سیمینار د جوړولو کمېسیون غونډه نن (چهارشنبه) د چنګاښ په ۲۳مه نېټه جوړه شوه.
په دې غونډه کې په فرهنګي چارو کې د ولسمشر سلاکار ښاغلي محمد زرین انځور، د پښتو څېړنو نړیوال مرکز رئیس څېړنپوه دکتور سید محی الدین هاشمي، د ملي راډیو ټلویزیون د پروګرامونو د تولید رئيس ښاغلي استاد همایون فیروز، د وزارت د اطلاعاتو او عامه اړیکو رئيس ښاغلي عبدالوحید خاورې، د تحقیق او مطالعاتو رئيس ښاغلي جاوید احمد وفا او د جرګه مجلې آمر ښاغلي عزت الله مینه ناک برخه اخیستې وه.
د غونډې په سر کې ښاغلي محمد آصف ننګ د کمېسیون غړو ته د ښه راغلاست ویلو ترڅنګ غوث خېبري د هېواد پیاوړی او حقداره لیکوال وباله وې ویل: چې باید موږ خپل نومیالي علمي – فرهنګي شخصیتونه په ژوند یاد کړو او د دوی د خدمتونو قدر وکړو.
دغه راز د غونډې ټولو ګډونوالو د سیمینار لپاره د کتابونو د چاپ، د مقالو د عنوانونو د ټاکلو، د سیمینار د مالي لګښت او مېلمنو لپاره د ځای د برابرولو او نورو اړينو مسائلو په اړه بحث او خبرې وکړې.
د يادونې وړ ده، چې دغه سيمينار به په راتلونکو څو مياشتو کې جوړ شي.
