په غزني ولايت کې د نثار تخصصي روغتون او مسلم پوهنتون څخه لېدنه!
د سرحدونو او قبايلو چارو وزير محترم محب الله صميم غزني ولايت ته د خپل رسمي سفر په دوهمه ورځ په دغه ولايت کې د نثار تخصصي روغتون او مسلم پوهنتون څخه، چې بېلابېل پوهنځي او رشتې لري، لېدنه وکړه.
په دې لېدنه کې د يادو بنسټونو مشر ښاغلي ډاکټر خېرالدين نثار د ياد تخصصي روغتون او مسلم پوهنتون په اړه معلومات وړاندې کړل او دا يې په عصري او معياري وسايلو سمبال بنسټونه ياد کړل، چې د غزني ولايت د خلکو په خدمت کې دي.
د سرحدونو او قبايلو چارو وزير د داسې پرمختګونو او نوښتونو قدرداني وکړه او د ښاغلي ډاکټر خېرالدين نثار څخه يې ځانګړې مننه وکړه، چې خپله پانګه يې په خپل هېواد کې د خپلو هېواد والو د درملنې او د هغوې د لوړو زده کړو لپاره په کار اچولې.
ښاغلي صميم له نورو ملي سوداګرو او پانګوالو څخه وغوښتل، چې په ورته اقداماتو لاس پورې او د خپل هېواد په پرمختګ او ابادولو کې رغنده رول ولوبوي.
